loading
یکشنبه 27 مهر 1394 ، 20:12

 

پیری میردو شی سیه‌ی درختو نیشته بی انجیرش موروت. یه انجیریم نی تو کپم و واتم چه انجیرا خاشی. واتش ها، اینی تو اوشامانه. ورگر بووه بلکم تمام گنه، پا گنی بشی دیه. اوّلی پوییز بره اینگا گلابی‌یم هند، گلابی نطنز نام نامی‌ین. تحفه‌ی نطنز که ماشونه، همی گلابی‌شن، قدیم نیاما مدرد بری عید. امسال نتانسّم یه عیدی خاشی به نوه‌گرم بدی، گرانی باای مردما یاندشن. ماشونه همو ای بدبختی‌گر شی سری ایمریکانه، یویی نوند اوینیشا باشه شمه چرا قیندتا را مدیکه دمی شاخی ایمریکا؟ اوشا زوور دارونه، همه زووان. اسبه یه سکلیش که مگا قیت بودو، ... بهل هیچی نوواشی. زووان یه چلزی گوشتی‌ین که سری آدما به وی مودو. هاره وی نمیه گرمن. ای گرمه اینی رخت‌گری پلاستیکی‌یم هند. پلاستیک نخاشی مرانه. هلای کرباسی و شووالی دبیت کنگا دیگه پیدا مگنه؟ قدیم پمبه‌ما مکاشت، مرسما، ‌ همینگا پارچه‌ما مبافت. چیشی‌ما مفارد؟! مهرا و قیسی. میواگری فشکا ماشیمه قیسی، شفتلی، زردلی. اینگا زعفرانم مکارونه، ا اینی خراسان وهترن. پارسال شیمه مشد با پرایدی کرم. خیفی پیل که آدم بودو پراید. نیسان آما ماشینا سفتی‌ین، دامام داره. قدیم ایمانه نبی، چاروادار بیمه، با اشتر میشیمه اسپاهان. هی‌ی‌ی روزگار هی‌ی، پیر گنیمه دیگه، هاره صبا هند که اشترو بیه دمی دیه‌ما باسه ... بووه، ورگر بووه بلکم تمام گنه پا گنی بشی دیه.

               


نظرات:
ارسال شده توسط: ستوده
چهارشنبه، 13 بهمن 1394، 10:59:14
عالی
ارسال شده توسط: علی فاروقی
دوشنبه، 17 شهریور 1395، 19:40:15
واقعا قشنگ بی دستتا درد نکره امید داریمه مطالب قشنگتر و وهتری در مورد سیوند به اشتراک بنیمه
ثبت نظرات مربوط به این مطلب
نام: * ایمیل:
سایت: نظر شما: *